Wargabatak Contoh Acara Pasahat Piso Halasan Tu Panomboli Di Ulaon Saur Matua Dalam Adat Batak
Tarsongonon ma sada tudosan ulaon pasahat piso halasan di ulaon saurmatua
( ulaonon di ulahon di Bakkara, kec Baktiraja, april 2021 di parsaurmatuaon ni natua tua nami )
 |
| Ilustrasi:Horbo sitikko Tanduk |
Dung mangarade bona ni hasuhuton dohot sijalo piso halasan, marsiadopan ma nasida asa dipukka bona ni hasuhuton pakkataion
Bona ni hasuhuton
Makkatai ma hita amang raja, raja ni panamboli
Dison nunga huparade hami pinggan na hot, parbue pir, napuran tiar, ringgit sitio soara dohot piso halasan na laho sipasahaton nami tu rajai raja panamboli asa radema rajai manjalo
Panamboli
Mauliate ma raja nami raja ni bona ni hasuhuton, nunga mangarade be hami, pasahat rajai ma
( Laos di uduti panambol ma pakkataion dung di jalo piso halasan i )
Mauliate ma di Tuhanta pardenggan basai di saluhut denggan ni basaNa na tongtong mandongani jala na mangaramoti hita saluhutna
Di hamu bona ni hasuhuton nami, dison di pasahat hamu pinggan na hot, parbue pir, napuran tiar, ringgit sitio soara dohot piso halasan, asa diama laklakna diama unokna, diama hatana diama na nidokna asa denggan ma bona ni hasuhuton nami marboa boa
Bona ni hasuhuton
Mauliate ma tutu di hamu raja ni panamboli, na manakkasi ma tutu rajai di sintuhu ni parpunguanta apala di satikkion
Asa takkas ma uju purba, takkasan uju angkola
Takkas ma tutu hita maduma, takkasan ma hita mamora
Sitakkas ni parpunguanta tutu apala di hatiha on asa takkas ma tutu hami bona hasuhutonmuna marboa boa
Raja nami, raja ni panamboli, takkas songon naung binotomuna ima di boa boa nami tu hamu panamboli, naung jumolo dialap Tuhanta natua tua na huhaholongi hami ima Op ...., laos di ari marsogot ma raja nami patupaon nami adat parsaurmatuaon na songon na pasaehon ari arina, pataruhon tu inganan parsatokkinani
Disialani i raja nami dison hupatupa hami do ima sitikko tanduk ( horbo ) na laho sambolon muna, asa tongtong ma raja nami martangiang hamuna tu amanta pardenggan basai asa anggiat sauduran hami tu dolok nang tu taruan, marsiamin aminan songon lampak ni gaol, marsitungkol tungkolan songon suhat di robean di hami bona suhut muna
Nuaing pe amang raja, raja ni panamboli, di namanakkasi rajai di sintuhu ni ulaonta di hatihaon, ima hatana laos ima nidokna
Botima mardongan mauliate
Panamboli
Mauliate ma di hamu bona ni hasuhuton
Di bagasan tingki on, nunga tangkas tutu dipaboa hamu naung jumolo di alap Tuhanta ima natua tua na tahaholongi Op .. sian tonga tonganta
Jadi, marhite i nunga dipasahat hamu piso halasan di bagasan tingki on, sai anggiat ma martinangi Amanta na martua Debata, dipasahat ma saluhutna napinarsinta ni rohamuna , asa sada rohamuna, dapot di hamu bisuk, dapot di hamu hamajuon tu joloan on. Songon i ma tutu nang natua tuanta naung parjolo marujung ngolu i, di ari marsogot ma pataruonta nasida tu inganan paradianan parsatongkinan i. Asa horas ma hamu bona ni hasuhutonnami, horas ma hita saluhutna ditumpak asi dohot holong ni roha na sian Tuhanta i, dapot ma angka na jinalahan ni rohanta lumobi ma di hamu bona ni hasuhutonnami. Nunga di son pinggan na hot asa hot ma attong mamasumasu Tuhanta pardenggan basai di hita saluhutna, adong muse parbue pir, asa pir ma pongki bahul bahul pansalongan, asa pir ma attong tondinta laho mangulahon ulaonta luju luju nang akka pansamotan
Udut tusi muse napuran tiar asa tiar ma attong akka nauli tiar ma akka nadengga dihita saluhutna, suang songoni ringgit sitio soara asa tio ma tutu soara ni akka raja di nalaho mangulahon adat parsaurmatuaon ni amanta naung dialap Tuhantai suang songoni muse ima piso halasan na naing pakkeonnami laho mangula ulaonta di bagasan sadari on. Asa songon hata ni situa-tua ma dohononnami:
"Songgop ma siburuk, songgop di huta sigaol
Horas ma attong hamuna suhut, horas ma nang hami panamboli"
Botima sian hami panamboli, horas..
Dungi diampehon panamboli ma piso i tu rukkung ni horbo i huhut idok
"Hu sambol ma raja nami"...
Di alusi bona ni hasuhuton i ma
"Sambol ma raja nami"...
Dungi di sambol ma sitikko tanduk i ( horbo ) i
Mauliate, Horas jala gabe
J Simanullang/ br Malau
Nb :
Pasahat piso halasan/ piso panamboli sada ulaon adat doi di ulaon saur matua ima ulaon pasahat piso tu panamboli na laho pakke on nasida manambol sitikko tanduk i ( horbo )songon boan ni natua tua di ulaon parsaurmatuaonna
Marragam do pangalahoni ulaon pasahat piso halasan hombar tu adat batak di luat na be
Molo tung adong pe na hurang lobi di guretanon asa uli jala une ma hita marsianju anjuan
Horas bangso batak