Tata Cara Ulaon Marhata Sinamot Dohot Ulaon Unjuk Dibagasan Sadari

Warga Batak Tata Cara Ulaon Marhata Sinamot Dohot Ulaon Unjuk Dibagasan Sadari

Horas mardongan tabe,Molo ulaon pangoli anak/pamuli boru, sai parjolo do ulaon marhata sinamot, baru pe diuduti ulaon unjukna di ari na mangihut

Alai dipudian ni ari on manghambit tu akka  partikkian tarlumobi mai di haroro ni panahit corona na piga taon on, gabe masa ma ulaon marhata sinamot di pasada dohot ulaon unjukna di bagasan  sadari i

Gambar:marhata Sinamot 

Nb : partupa ni ulaonon ikkon jolo uli jala une di hatai na dua hasuhuton di tikki ulaon marhusip molo di Jabotabek digoari ma i marhusip na gogo

Tarsongonon ma sada tudosan ULAON MARHATA SINAMOT DOHOT ULAON UNJUK dibagasan sadari i di Luat Bandung

Dung simpul marsipanganon/mambagi jambar juhut/ Manjalo tumpak hasuhuton paranak, dohot manjomput tumpak ( parumaen ) di mulai ma manghatai:

Protokol ni paranak:

Jadi boha tulang nga boi tamulai?

Protokol ni parboru:

Nauli Amang boru dos rohatta.

Protokol ni paranak:

Mauliate Raja nami mangido tingki majo hami satongkin asa mardos ni tahi jo hami angka namar dongan tubu.

Protokol ni parboru

Gabe horas amang boru ulahon hamu ma.

Protokol ni paranak:

Jadi songoni ma dihita namardongan tubu pomparan ni omputta....

Didok natua-tua  tinallik huling-huling laos tarida holi-holi.

Molo hahana marulaon Anggina ma nagabe Raja panamboli songoni ma nang sebalikna. Jadi nuaing pe, tangkas songon na taboto di hami pomparan ni Ompu ... ma nuaing na mangkasuhutton ulaonta di sadarion alani i hupasahat hami ma tu hamu haha anggi doli nami asa hamu ma na laho mangalusi sungkun sise ni hula-hulanta raja i .... 

Dung marsialapan hata manang marsipasangapan namardongan tubu dapot ma ujung ni hasadaan ni roha manang na ise na gabe raja pangalusi sian nasida sekaligus ma Raja pangalusi ni paranak manguduti panghataion

Raja pangalusi ni paranak :

Mauliatema...

Horas ma jala gabe,.. gabe ma jala horas

Ompunta sijolo jolo tubu martukkothon sialagundi

Adat na pinungka ni omputta na parjolo tung takkas doi ihuthonon ni hita sundut na umpudi

Asa togu urat ni bulu paihut ihut urat ni salaon

Togu do hita namardongan tubu jala sada do hita nang di angka ulaon

Di ulaon las niroha suang songoni nang diakka ulaon na asing i dope, uli jala une do hita marsipasangap sangapan, asa anggiat dapot songon hata ni natua tua

Tampunak ni sibaganding di dolok ni pangiringan Horas jala gabe ma hita namarhahamaranggi molo nunga hita marsipairingiringan

Asa marluga ma parluga manghunduli goligoli

Molo anggina na marulaon haha doli ma na gabe panamboli

Molo mamolus pe solu bolon mamolus mai manopinopi

Molo haha doli pe na gabe suhut bolon, anggi doli ma na gabe panamboli 

Diulaonta sadarion dinapangolihon anak hita tu hula hulatta rajai ....

 Asa sada ma hita songon daion aek, unang mardua songon daion tuak

Asa tung denggan jala uli martupa ulaonta on dibagasan holong dohot las ni roha

On pe hujalo ma ulaon sangapon nalaho mangulahon ulaonta sadarion dibagasan serep dohot unduk ni roha , alai tong do dohonokku tu hamu sude  dongan tubukku, holan namanghatahon do au, anggo hatai hatani hita sudena doi

Alani i .. atik adong annon nahurang lobi di panghataiononku mangalusi sukkun sise ni  raja ni hulahulanta asa nanget ma goit hamu au sian hambirang jala husippon hamuna sian siamun asa denggan jala uli partupa ni ulaonta on

Suang songonima di hamu na huhaholongi hami, inanta soripada, boru ni rajai

Asa hot ma hamu di hundulanmuna, tangihon hamuma akka hata ni raja, molo adong napuranmuna denggan ma i atupi hamuna, molo tung adong pe nanaing sihataanmuna nanget ma hamu marhusip unang hubege hami asa denggan jala uli martupa ulaonta on

Suang songonima nang di hamuna raja ni amang boru nami, ... raja ni boru, bere nang ibeberenami, ... 

Raja ni amang boru, hata ni natua tua mandok

Durung do boru, tomburan hula-hula

Ingkon do porsanon ni boru, siporsanon ni hula-hula

Raja ni amang boru diulaonta sadarion gogomuna do na hupangasahon hami alani i asa takkas ma hamu di lambung nami tarlumobi boru parlopes nami atik adong annon nalaho siulahonon hamu do sareaon nami

Suang songonima nang dihamu raja ni dongan sahuta nami

Amang raja, inang soripada... hata ni natuatua mandok

Tinallik landorung bontar gotana

Sisada anak, sisada boru jala sisada ulaon do namardongan sahuta nang pe pulik be margana

Alani i rajanami asa rap marnatampak mahita, ima dinalaho mangalusi sukkun sise ni raja ni hulahulanta

Suang songonima dihamu na huparsangapi hami raja ni tutur nami, rajani hula hula dohot raja ni tulang nami

Hula hula raja i ...

Tulang raja i ..

Tulang rorobot ..

Bona tulang raja i ...

Hula hula namarhahamaranggi raja i...

Hula hula anak manjae raja i ...

Raja nami tulang nabasa, tokkin nai naing mulaan nami ma makkatai dohot raja ni hula hula nami raja i... nunga tung pos rohanami raja nami, ala ditonga tonga nami do hamuna nalaho mangajari jala nalaho manuturi hami

Ai takkas huboto hami

Andalu do panduda, anduri do pamiari

Hamu do hula hula namalo manuturi dohot tulang namalo mangajari

Alani i raja nami, annon jumpang di tikkina, dapot di ombasna na ro do hami nalaho mangido panuturion sian hamuna saluhutna horong ni hula hula dohot tulang nami

 

Ai takkas do huboto hami

Di jolo hamu siaduon, dipudi hamu sipaimaon, di tonga tonga hamu sihaliangan nalaho manuturi huhut mangajari hami

Asa marpanakkasi ma hami raja nami, boha rajanami nunga tipak jala uli parhundul ni raja i 

Gabe ma jala horas, mauliate ma di rajai

Songonima dihamu raja ni hula hula nami rajai... nunga sikkop be sian hami di liat ni pakkataion di dos ni tahi nami nalaho mangalusi sukkun sise ni rajai, partikkian on pe pinasahat ma tu raja i...

Protokol ni Parboru:

Mauliate amangboru, tong majo mangido tingki hami satongkin asa marsipasangapan hami namardongan tubu 

Raja pangalusi ni Paranak:

Nauli Rajanami. Ulahon raja i ma

NB. Di tingki namarsirenggetan parboru manontuhon na gabe raja panise di nasida sarupa ma pangulahon na songon na niulahon ni horong paranak

Dung dapot ise na gabe raja panise di pihak parboru langsung ma di uduti Raja panise ni parboru pasangaphon horong ni hula hula dohot tulang sekaligus manguduti panghataion dohot horong ni paranak

Raja panise ni Parboru:

Jadi boha amang boru nga boi be tamulai pangkataionta?

Raja Pangalusi ni Paranak:

Gabe jala horas nuga be tulang

Raja panise ni Parboru:

Parjolo ma hupasahat hami hamuliateon ni roha nami tu adopanni amatta na martua debata, ala tong-tong  dope dibagasan hahipason  hami ro sian tonga ni luat nami sahat tu luat ni amang boru di bagasan tingkion.

Amangboru didok natua-tua, Asa pitu ma goar ni ari, sapulu dua goar ni bulan, 

Ala naeng mulaanta nama amang boru manghatai pasahat hamu ma jolo pinggan panungkunan.

Raja pangalusi ni Paranak:

Gabe ma jala horas Rajanami,

Baris-baris ni gaja di rura pangaloan, molo marsuru raja na ingkon do oloan, molo so ni oloan olo ma iba agoan alai molo ni oloan martamba tamba ma nang angka parbinotoan

Asa pitu ma tutu bona ni ari sapulu dua bonani bulan, nunga manggora raja ni hula hula laho mamulai makatai dison pasahaton nami ma pinggan panungkunan. Boru nami pasahat hamu pinggan panungkunan on tu adopan ni Raja ni hula hulanta, tampuk nai baen hamu tu adopan ni Rajai. Pasahat ma.

Raja panise ni Parboru

Mauliate ma amang boru

Nunga dison nuaeng Pinggan Panungkunan, Pinggan Pasu na hot di hundulanna,

Sai tio ma di hamu parniidaan tu joloanon, jala hot ma pasu-pasu nasian Tuhanta.

Dison adong Parbue Pir, parbue siribur-ribur,

Antong Pir ma pokki bahul-bahul ma pansalongan

Pir ma tondimuna sai tung godang ma pangomoan

jala tung torop maribur ma antong hamu marpinompar

Alani i tung dohonon nami ma,

Nialap ma Piar-piar, sian onan ni huta tinggi

Tudeak na ma hamu marpinompar, bagasmuna sitorop pangisi

Peak di ginjangna Napuran sirata bulung, napuran tiar asa tung tiar ma antong Passamotan suang songoni dohot Parhorasan jaloon muna tujoloan ni ari on.

Laos adong muse rupiah namararga, napinatupa ni pamarentanta

Sipalas roha ni situan natorop dohot amanta raja, hasoloman ni inanta soripada

Sai martamba ma antong las ni rohanta tu joloan on

Asa dohonon ma songon nidok ni natua tua

Pinantikhon hujur ma di topi ni tapian

Manang tudia pe hita mangalangka sai tongtong ma hita dapotan parsaulian

Songoni muse adong Juhut namarsaudara ima Tanggo-tanggo na bolon,

Sai anggiat ma antong lam tanggo jala togu partuturonta namarhula-hula boru, gabe parhorasan tu joloan on.

Nb :

Di buat raja parhata ni parboru ma tolu bulung sian hepeng na di pinggani, jala dipasahat tu hasahatanna, laos di paulak ma muse pinggan pasu namarisi hepeng sada bulung nai songon pinggan pangalusi 

Jadi songonima di hamu raja ni pamoruon nami,  Nangkin nunga hu jalo hami pinggan panungkunan, saonari pe amang boru pasahaton nami ma on sada tu hamuna songon pinggan pangalusi namarlapatan doi antong, asa tung sada hamu nalaho mangalusi sungkun sise nami hula hula muna

Boru nami, pasahat hamu pinggan pangalusi on tu adopan ni raja ni amang boru nami.

Raja pangalusi ni Paranak:

Mauliate ma Raja nami.

Mangido tingki ma jo hami satokkin raja nami asa hutariashon jolo pinggan pangalusi on tu hami namardongan tubu

Raja panise ni parboru :

Gabe amang boru, ulahon hamuma

Raja pangalusi ni paranak

Suang songoni ma di hita saluhut namardongan tubu pomparan ni omputta .....

Dison tajalo do sada pinggan pangalusi sian rajani hula-hulatta Rajai .... namarlapatan doi antong asa tung sada hita annon na laho mangalusi sukkun sise ni raja ni hula hulanta. 

Di dok natua-tua 

Ni durung pora-pora laos mangihut dapot sibahut, molo dung antong jinalo sipalas roha, denggan majo pinamasuk tu hajut

 Molo pe au na gabe hasahatanna na rap manjalo ma hita ate..

Jadi songoni ma di hamu raja ni hula hula nami nungga rade be hami Raja nami laho mangalusi sungkun sise ni raja i, partingkianon pe hupasahat hami ma tu raja i mardongan mauliate

Raja panise ni Parboru:

Mauliate ma Amang boru, manghatai ma hita tutu.

Amang boru,nunga bosur hita mangan, sagat marlompan juhut na marsaudara sai pamurnas mai tu pamatang saudara tu bohi, sipalomak imbulu mai, jala sipaneang holi-holi.

Asa bagot namarhalto ma ni agatan di robean, horas ma hami na manganton sai martamba tamba sinadongan ma di hamu  pamoruon nami na patupahon

Amang boru,..bangkona doi antong sai jolo ni nang-nang do asa ni nung-nung sai jolo nipangan do asa ni sungkun.

On pe amang boru 

Dia ma lak-lak na, dia ma unok na.

Dia ma hatana jala dia ma na ni dok na tangkas ma di paboa amang boru botima 

Raja pangalusi ni Paranak:

Gabe ma jala horas Raja nami, ia nunga manungkun tutu Rajai di si panganon masak naung tahasagathon naso sa dia i, 

Asa si titi ma si hompa, golang golang pangarahutna, otik so sadia raja nami na hupatupa hami i, sai godang ma pinasuna.

 

Asa bagot na marhalto ma tutu ni agatan di robean, horas ma luhut rajai namanganton tung tamba ma di hami pamoruon mu napatupahon.

Raja nami di dok na tua-tua marbau tanduk mar bau holi-holi, asa godang sibutong-butong, otik antong sipir ni tondi, tung so sadia pe rajanami na hu patupa hami i sai pamurnas mai tubadan saudara tu bohi, sipalomak imbulu mai jala sipaneang holi-holi.

Ia baritani sipanganon masak naso sadia i Raja nami, Panggabean parhorasan do pinaboana botima raja nami mardongan mauliate

Raja panise ni Parboru:

Mauliate ma amangboru, mansai las si tutu antong roha umbegesa panggabean parhorasan do antong barita ni sipangamon na pinatupa munai, asa dohonon nami ma amang boru

Pinantikhon hujur ma di topi ni tapian

Manang didia pe hamu mangalangka sai disima hamu dapotan parsaulian

Alai amang boru di dok natua-tua marangkup do ninna nauli jala mar dongan do nadenggan. Si angkup na ma i songon nahundul, si donganna songon na mardalan. Asa tangkas ma uju purba tumangkasan ma uju angkola, asa tangkas hita maduma, tangkasan ma nang mamora. 

Onpe Rajani ni amang boru sitangkas ni panggabean parhorasani tangkas ma hamu marboa boa , botima.

Raja pangalusi ni Paranak:

Gabe ma jala horas rajanami, ia nunga manangkasi nuaing rajai disintuhu ni panggabean parhorasani,  di siangkup na songon nahundul sidonganna songon na mardalan. Asa tangkas ma jabu suhat tangkasan ma jabu bona, Asa tangkas hita maduma tangkasan ma nang mamora.

Onpe antong paboaon nami ma songon si tangkas na.

Raja nami di dok natua-tua 

Denggan ma bulu godang ni baen gabe hite molo nunga anak magodang denggan ma i asa hot ripe

Raja nami, Tulang naburju, Raja ni hula-hula nasogot nungga rap mangudurhon hita, ima ianakonta, Anak nami antong nagabe helamu, Dohot boru ni Rajai na gabe parumaen nami, 

Ima namanjalo pasu-pasu pardongan saripeon nasida sian bagas joro ni tuhanta marhite naposona jala denggan saluhut na mardalan dibagasan las ni roha

Molo di pasiat rajai angka elek-elek dohot pangidoan nami laos di bagasan tikkion ma nian hami pamoruon muna marga ...  ima nanaeng pasahathon somba ni adat, somba ni uhum nami tu rajai, lumobi ma antong tu keluarga na imbaru on, asa anggiat olat nion tu joloan ni ari gabe si tubuan ni anak, situbuan boru on dihami pasu-pasu on ni tuhanta pardenggan basa marhite tangiang muna saluhutna hula-hula nami 

Jala dang na pola siat mamiding gabe siat ma molak hami Rajanami, molo di pasiat rajai angka elek-elek dohot pangidoan nami las ihut manian rajanami di ulaon sadari. Ima si angkup na dohot si donganna raja nami botima mardongan mauliate 

Raja panise ni Parboru:

Mauliatema amang boru tung mansai las si tutu antong roha umbegesa, na naeng pasahat somba ni adat somba ni uhum ma hape hamu tu hami hula-hula mu di bagasan tingkion.

Nungga pitu lili nami paualu juguan nami, Nunga tung uli nipi nami amangboru ai gohan muna ma hape hajut nami.

Nuaeng pe amang boru namarhata sinamot ma hita ate amang boru?

Raja pangalusi ni Paranak:

Gabe jala horas rajanami ima elek-elek dohot pangidoan nami mauliate tulang.

Raja panise ni Parboru:

Mauliate ma amangboru, nuaeng pe antong di namarhata sinamot hita pasahat hamu ma si namot ni boru nami, piga bara ma horbona,asa pintor binaen tu adaran.

Piga bara ma hodana, asa pintor binaen hundulanni angka amatta raja.

Sadia godang ma mas na asa pintor binaen pangkeonni angka nantulang muna laho maronan. Nang sadia godang ma rupiana, sude ma pasahat hamu amang boru, asa tung las rohanami angka hula-hula muna. Ima elek-elek dohot pangidoan nami tu hamu saluhut na amang boru nami botima amang boru.

Raja pangalusi ni Paranak:

Mauliate ma rajanami di pasahat rohanami tuhamu di bagasan tingkion, napatut doi antong pasahaton nami saluhutna pangidoan ni rajai,

Alai Raja nami, Raja bolon, Dang na hulikkuling na hona dalhoppon be hami tu hamu, manang imbulu nasinuatton. Sian mulai oppung nami nungga gelleng muna hami rajanami.

Songon ni dok ni natua-tua:

Barita ni lampedang, mardangka bulung bira, barita ni haburjuon mu hula-hula nami ... tarbarita doi sahat ro di dia.

Alai Raja nami raja bolon , olat ni nasatolap gogo nami na tong-tong do pasahaton nami songon somba ni adat somba ni uhum nami tu rajai.

Molo di pasiat rajai akka elek-elek dohot pangidoan nami, asa si sahali mangelekkon sahali manombahon mahami raja nami di rupia natinopani pamarentatta disi ma horbona ,disi hodana las ima nang mas na ima elek-elek dohot pangidoan nami tu hamu saluhut na hula-hula nami botima raja nami

Raja panise ni Parboru:

Mauliate ma amang boru.

Alai anggo au amang boru  dang boi tartolopi  au dope di akka elek-elek dohot pangidoan munai.

Alani i mangido tingki majo au satongkin asa mardos ni tahi jo hami na mardongan tubu lumobima asa hujalo hami panuturion sian raja ni tutur ima horong ni hula hula dohot tulang nami, 

Alai amang boru anggo di suhi ni ampang na opat dohot di angka panandaion tangkas doi pasahaton muna ate amang boru?

Raja pangalusi ni Paranak:

Pos rohamu Rajanami, Tangkas doi pasahaton nami.

Raja panise ni Parboru:

Jadi songoni ma di hita namardongan tubu saluhut pomparanni ompunta dohot boru bere suang songonima nang di dongan sahuta nami, nunga tung tangkas tabege di hata pangidoan  dohot elek elek ni raja ni pamoruonta nangkin, ima di sinamot ni borunta dohot paribanmuna hamuna boru nami na sisahali mangelekhon nasida alani i asa tabahen pandapotta, parjolo ma tu boru bere nami. Boru nami baen hamu pandapot mu.

Nb. Dung simpul sian boru bere, dongan sahuta dohot namardongan tubu langsung mangido panuturion ma tu horong ni hula-hula dohot tulang.

Jadi songonima di hamu Raja ni pamoruon nami, nungga tangkas di bege hamu naung marsialapan hata hami namardongan tubu, dohot boru bere ibebere suang songoni dohot dongan sahuta nami tarlumobi mai namanjalo panuturion hami sian Raja ni hula-hula dohot tulang nami.

Nuaeng pe amangboru di angka ele-elek pangidoan munai, di na sahali manombahon hamu di sinamot ni boru nami, hu jalo hami mai amang boru, 

On pe hatahon hamu ma si namot ni boru nami. Botima

Raja pangalusi ni Paranak:

Gabema jala horas Rajanami, Alai mangido tingki majo hami satongkin, asa hu jalo hami jo panuturiaon sian horong ni hula hula dohot tulang nami 

Raja panise ni Parboru:

Ulahon hamu ma amang boru.

Raja pangalusi ni Paranak:

Manjalo panuturion sian horong ni hula-hula dohot tulang dang pola andul/beda songon parboru hampir sarupa do bahasana. Dung simpul sian hula-hula dohot tulang, parsinabung paranak langsung manghatahon boni ni sinamot.

Jadi songonima di hamu hula-hula nami rajai raja ...

Onpe hatahonon nami ma si namot ni boru ni Rajai godang na Rp....

Disima horbona , disi hodana las ima nang mas na.

Elek-elek dohot pangi doan nami asa oloppon Rajai mai. Mauliate.

Raja panise ni parboru :

Mauliatema amang boru, hata ni natua tua mandok lata pe latai, duhut-duhut do si but-buton, 

Hatani Raja pe nihatahon tetap hasuhuton do si baen keputusan.

Jadi songonima di hamu suhut nami, nungga tung tangkas di bege hamu pangkataion nami dohot raja ni amang borutta, jala nungga hu usahahon nian mangido tu nasida nasatolap ni gogokku onpe asa baen hamu ma pandapot mu.

Paidua ni suhut par boru :

Mauliate ma amang raja doli, tandokmu do tandokhu, pandokmu do pandokhu alani i gabehon damang ma

Raja panise ni Parboru:

Jadi songonima di hamu pamoruon nami nungga tangkas di bege hamu di nahu tangkasi suhut nami, 

Onpe amang boru hu gabehon hami mai si namot ni boru nami i godang na Rp....

Laos saonari ma amang boru pasahat hamu sinamot nagok tu suhut nami.

Raja pangalusi ni Paranak:

Mauliate malambok pusu ma hupasahat hami tu hamu saluhut na hula-hula nami Rajai.....

Ala pintor sude do angka elek-elek dohot pangi doan nami di oloi rajai mauliate ma di hamu.

Jadi songoni ma di hamu suhut nami, borhat ma hamu siani tuson, boan hamu ma si namot ni parumaenta.

Nb. Dung simpul di pasahat sinamot, di uduti ma muse tu suhi ni ampang na opat + dst...

Marudut....bersambung...

Songoni ma sada tudosan ulaon marhata sinamot sekaligus ulaon unjuk dibagasan sadari i

Asa partali sahulhulan parbonang sasimbohan

Asa manatma hita marsisukkunan jala nanget marsipadohan

Molo tung adong  na hurang lobi  asa nanget ma hita marsiajaran

Horas bangso  Batak